ODaNek eta CREDek antolatutako Datuen Espazioari buruzko jardunaldian ehun pertsona baino gehiagok parte hartu dute. - Oficina del Dato de Navarra
ODaNek eta CREDek antolatutako Datuen Espazioari buruzko jardunaldian ehun pertsona baino gehiagok parte hartu dute.
Topaketa hau Nafarroako enpresei eta zentro teknologikoei zuzenduta zegoen, eta helburuen artean zeuden ODaN, haren zerbitzuak eta lankidetza publiko-pribatuko bideak aurkeztea; datu-espazioek enpresen lehiakortasunerako, berrikuntzarako eta negozio-eredu berrietarako tresna estrategiko gisa duten balioa ikusaraztea; eta Nafarroako S4 Estrategiaren sektore estrategikoetan (elikadura, turismoa, osasuna, energia, mugikortasuna, ikus-entzunezkoak, etab.) garatutako proiektuak eta benetako erabilera-kasuak erakustea.
Itziar Berrospe Garcíak, Nafarroako Gobernuko Aurrerapen Digitaleko Zerbitzuko zuzendariak, eman zien ongietorria bertaratuei. Ondoren, Jon Legarrea ODaNeko atalburua, ODaNetik bultzatutako datu-espazioen proiektuak nabarmendu zituen, hala nola EDNa (Nafarroako Datu Espazio Multisektoriala), Spain Living Lab (Turismoaren datu-espazioak) edo Twin, Nafarroak datuetan eta lankidetzan oinarritutako berrikuntza-eredu baten alde egindako apustua erakusten dutenak. ODaNek Nafarroako datu-ekonomian duen eginkizuna eta ekarpena azaldu zituen. Jon Legarrea.
Jardunaldiaren itxiera Garbiñe Basterrak egin zuen, Trantsizio Energetiko eta Digitaleko, Enpresa I+G+b-ko eta Ekintzailetzako zuzendari nagusiak. Hark Industria Departamentuak Nafarroako enpresen digitalizazioarekin duen konpromisoa nabarmendu zuen, besteak beste Datuen Zientziaren Laborategia, Datuak Atzemateko Programa, Adimen Artifizialaren Laborategia eta Datu Espazioak bezalako programen bidez. Ekimen horiek guztiak Nafarroako ekoizpen-sarearen lehiakortasuna eta eraldaketa digitala indartzera bideratuta daude.
Bestalde, María Paloma Díazek, CREDeko ordezkariak, SEDIAren Datu Espazioen Kita zertan datzan azaldu zuen. Laguntzak emateko programa bat da, eta enpresa handien eta ETEen lehiakortasuna nola bultza dezakeen ere azaldu zuen. Kit honen helburua da erakundeek (publikoek zein pribatuek) sektoreko datu-espazioetan parte hartzea sustatzea, parte-hartzaileen kopurua handitzea datuak partekatzeko ekosistemak eskalatuz, eta partekatutako datu-multzoen kopurua handitzea.
Jardunaldian beste hizlari batzuek ere parte hartu zuten, bai esparru publikokoek, bai pribatukoek, eta datu-espazioak garatzeko eta/edo erabiltzeko arrakasta-kasuak aurkeztu zituzten.
Javier Ignacio Jaureguik, CNTAko Kalitate eta Elikagaien Segurtasuneko zuzendariak, eta Javier Martínezek, CNTAko Eraldaketa Digitaleko zuzendariak, “Datuaren balioa Nekazaritzako Elikagaien Sektorean: ALIMETRICS Datu Espazioa” esperientzia aurkeztu zuten; Unai Garbisu de Goñik, Nafarroako Gobernuko Berrikuntza eta Turismo Behatokiko atalburua, bere kasua ere azaldu zuen. NTT Data, Inetum eta Asociación Innovalia bezalako beste enpresa eta erakunde batzuen esperientziak ere ezagutu ahal izan ziren, baita Euskadiko Mugikortasunaren eta Logistikaren Klusterraren kasua ere.
Topaketa modalitate hibridoan egin zen, eta, beraz, aurrez aurre parte hartu ahal izan zen IRIS Navarra Berrikuntza Digitaleko Poloaren egoitzan, baita streaming bidez ere.